Bota po i mban sytë nga Kina, e cila ka nisur të izolojë qytete të tëra nga frika e përhapjes së koronavirusit të frikshëm. Sëmundja ka vrarë 17 persona deri më tani.

Autoritetet e qytetit Wuhan me 11 milionë banorë thonë se kanë pezulluar trenat dhe avionët, po ashtu edhe metronë, autobusët dhe tragetet.

Një banor i tha BBC-së se u kanë thënë që të mos dalin nga shtëpia. “Duket sikur ky është fundi i botës,” tha ai.

Shumë banorë druhen se do u mbarojnë ushqimet.

Wuhan është qyteti prej nga e ka origjinën koronavirusi.

Sipas Daily Mail, shkencëtarët besojnë se virusi vdekjeprurës e ka origjinën nga një treg i hapur në këtë qytet. Ai besohet se ka kaluar nga gjarpërinjtë te njeriu.

Shkencëtarët besojnë se gjarpërinjtë kanë qenë ‘rezervuari’ për virusin, që është modifikuar dhe ka kaluar te njerëzit.

Në fillimet e tij, virusi nuk përhapej nga njeriu te njeriu. Por tashmë që ka nisur ky transmetim, frika në mbarë botën është shtuar ndjeshëm.

Ky virus është vetëm versioni i shtatë i një koronavirusi që prek njerëzit.