Fjalët magjike, përdoren shpesh nga magjistarët, kur janë duke kryer truket e tyre magjike në skenë. Dhe një nga termat e tyre më të shpeshtë, është “Abracadabra”. Edhe pse kjo fjalë është e njohur për shumë njerëz, ka të ngjarë që pak njerëz ta dinë origjinën e vërtetë të saj.

Përveç “Abracadabra”, ekzistojnë disa fjalë të tjera magjike, që përdoren gjerësisht nga magjistarët e skenave. Dhe ashtu si “Abracadabra”, origjinat e këtyre fjalëve, janë gjithashtu një mister për shumicën e njerëzve.

Po nga vjen fjala “Abracadabra”? Ndërsa ky term përdoret zakonisht nga magjistarët në skenë për argëtimin e masave, kjo fjalë thuhet se ka origjinën e saj në botën e lashtë romake. Në atë kohë, ky term nuk përdorej nëpër shfaqje, por besohej se përmbante në vetvete fuqi të mëdha magjike.

Sipas një teorie, fjala “Abracadabra” rrjedh nga fjalët hebraike “ab, ben, ruach hakodesh”, që përkthehet si “Ati, Biri dhe Shpirti i Shenjtë”. Pra, fjala “Abracadabra”, është në fakt një lutje e Trinisë së Shenjtë . Sipas një teorie tjetër, kjo fjalë magjike rrjedh nga një fjalë tjetër magjike e njohur si “abraxas”, në greqishten e vjetër. Kjo fjalë është e veçantë, pasi gërmat e saj, në numerologjinë greke, janë 365, që është numri i ditëve në një vit.

Një tjetër teori për origjinën e fjalës “Abrakadabra”, është fraza në gjuhën aramaike “Avra kadavra”. Fansat e serialit “Harry Potter”, mund të jenë ndoshta familjarë me këtë frazë, teksa një magji e ngjashme “Avada kedavra”, ndodh në njërin ngaa librat.

Në serinë e “Harry Potter”, “Avada kedavra” funksionon si një mallkim vdekjeprurës dhe shkrimarja J.K.Roulling, thuhet se është frymëzuar për këtë magji nga version i tij origjinal në gjuhën aramaike. Domethënia origjinale e këtyre fjalëve magjike, sipas Roulling, është “Le të shkatërrohet kjo gjë”, dhe është përdorur dikur për shërimin e sëmundjeve të ndryshme.

Gjithsesi, “Abracadabra”, është përdorur si një lloj hamajlie gjatë epokave. Historiani romak i shekullit II, Serenus Samonikus, përshkruan në librin e tij “Liber Medicinalis” mënyrën se si mund të përdorej kjo fjalë magjike. Ky lloj talismani, përfshinte fjalën që ishte shkruar mbi një copë pergamenë në formën e një piramide me kokë poshtë, me një gërmë që hiqej çdo herë, derisa në fund të mbetej vetëm njëra nga gërmat.

Në Mesjetë, njerëzit besonin se çdo ngjarje që ata nuk mund ta shpjegonin, mund të shkaktohej nga magjia. Dhe shumica e popullsisë së Evropës mesjetare, druhej se mund të ishte prekur nga ndonjë magji, Prandaj përdorte shpesh termin “Abracadabra”, për të shmangur çdo mallkim apo magji të dërguar në drejtim të tyre.

Ashtu si në kohët e Romës së Lashtë, ajo u përdor gjithashtu për të “kuruar” sëmundje të ndryshme. Përdorimi i kësaj piramide “Abracadabra”, është përmendur nga shkrimtarët në epokat e mëvonshme, duke përfshirë Eva Tejlorin në shekullin XVI.

Gjithashtu, “Abracadabra” përdorej ende në shekullin XVIII-të, siç shkruante Daniel Defo në “Gazetën e Vitit të Murtajës” së vitit 1722 , se mjerisht gjatë kësaj epidemie, pati një përdorim të madh të supersticionit:“Njerëzit nisën të jepen pas supersticioneve, nisën të mbajnë hamajli të ndryshme, për të forcuar trupin e tyre kundër Murtajës.

A thua se Murtaja, ishte vetëm një lloj posedimi nga një shpirti i keq; që mund të mbahet larg me shenjat e Zodiakut, apo letra me figura të ndryshme simbolike, dhe veçanërisht nga fjala Abracadabra, e shkruar disa herë në formën e Trekëndëshit ose Piramidës…

Sa njerëz të varfër e gjetën veten duke u marrë më keto gjëra, dhe sa shumë prej tyre përfunduan më vonë në karrocat e mbushura plotë me të vdekur. Në fund, njerëzit ndaluan së besuari në efikasitetin e “Abracadabra” për t’i shëruar apo mbrojtur njerëzit, dhe kjo fjalë nisi të lidhej me magjistarët që kryenin truke magjike”.

Një tjetër fjalë e zakonshme magjike është “Alakazam”. Kjo magji thuhet se ka origjinën e saj në gjuhën arabe, dhe ekziston edhe një fjalë e ngjashme me këtë gjuhë, “Al Qasam”, që do të thotë betim. “Hocus Pocus”, është një tjetër fjalë magjike që përdoret shpesh nga magjistarët.

Ndryshe nga “Abracadabra”, origjina e kësaj fjale magjike i përket të kaluarës më të afërt, për të qenë më të saktë rreth shekullit XVII-të. Ashtu si me “Abracadabra” dhe “Alakazam”, ka disa teori që përpiqen ta shpjegojnë origjinën e kësaj fjale.

Një shembull ofrohet nga Xhon Tilotson, arqipeshkvi i Kantërbërit në vitin 1694. Tilotson sugjeron që kjo fjalë është një deformim i termit latinisht “hoc est corpus meum” (Ky është trupi im), dhe është një parodi e të shenjtës gjatë Meshës Katolike.

Një tjetër sugjerim, është se kjo fjalë dukej thjeshte ekzotike, dhe në fakt është shpikur për shkak se ajo rimon. Ajo mund të jetë një fjalë e pakuptimtë, e sajuar vetëm për t’i bërë përshtypje njerëzve gjatë një mashtrimi magjik. Përveç këtyre fjalëve magjike tradicionale, ka edhe shumë të tjerë që janë shfaqur në kohët e fundit, dhe që përdoren kryesisht tek filmat e animuar për fëmijë.

Ancient Origins – Bota.al